Takhliyaaaaaaaa!!!

              Waise hai toh ad ek pan masala ka par punch line bahut mast hai… “Shauq badi cheeez hai….”  Aise hi ek punch ‘word’ bhi hai jo khud mein bahut lazeez hai…par agar who istemaal  sahi jageh pe hua toh….aur who word hai, Takhliyaaaaaaaa!!!

                                           Toh ab kahiye Tkahliyaaaaaaaa aur chaliye humaare sath… jee han! Bhaiyon aur bhaiyon ki behno, aaj hum aap sabhi ko uss jageh pe le challenge jahan aap chahein toh khud ko khud hi entertain kar sakte hain, khud hi khud ki peeth thapthapa sakte hain aur chahein toh khud ke matlab ke liye kisi ka dil bhi jeet sakte hain… who bhi nawaabon ke isstyle mein….aur keh sakte hain Takhliyaaaaaaaa!!! Aur who jageh hai apke ghar ki KITCHEN. 

Khaane ka shauq kisse nahi hai…aur agar khana shauq se khane ke sath-sath, shauq se banaya bhi jaye toh ‘Wah kya baat hai…’!!! main ye nahi keh rha ki sabhi banayein par jo banaana chahta hai, who banayein, aur  unhe jo aanand aayega hai uska kya kehna who sirf wahi bayaan kar sakte hain… isska andaza hum nahi laga sakte...! Iss anand ko maine jiya hai aur barahan jiya hai…iske do fayde hain ek toh gharwali happy aur doosara aur sabse important khaane ka swaad hud se zyaada. Shuruat karni chahein toh bas sahi waqt wahi jab aapko bhookh lagi ho tezzzz aur khana banane mein lagne wali ho derrrr … phir kya ghus jaiye kitchen mein aur phir hoga ye 'bhookh chali jaygi baaju mein aur khana banane lagega swadisht…' guaranteed!! Nahi aata banaa toh bhi achha hai, patni se poochh lijiye, unhein apka poochhana achha lagega, aur agar patni ji ke paas na ho waqt toh Youtube hai na…uspe maaro enter aur phir, shhhhhhh!!!!! lazeez pakwaan apke dining table par.

Pata hai main kya karta hun, You tube pe Sanjeev Kapoor se shuru karta hun aur ek grihani ke bhi pakwan ka tak ka leta hun jayeza aur ant mein banata hun pakwan khud ke style mein…buzurgo ne kaha hai na “Suno sabki karo apni” toh bhai aise mein ban jaata hun main Ghar ka “Master Chef” aur aapko achhi tarah pata ho ki jab aap kitchen mein ghuste ho toh sabse zyaada emotional Gharadi (Gharwali) hoti hai aur sabse zyaada tansion bhi gharaadi ko ho hoti hai…Emotional isliye ki ‘khane ki shakl mein pati ka pyar milta hai’ aur tension isliye ki "aaj toh hua kitchen ka styanashhh"…khair main toh ek hi kaam karne deta hun…EMOTIONAL…kitchen se nikala toh pehle se bhi saaf". Ek important baat aur agar aap apni Creativity ke liye mashhoor hain toh “KITCHEN is one of the best place to show your Creativity”. Jaise main Qayede se RJ aur profession se Creative Head…iska fayeda ye ki "Kitchen mein mere sath sath recipe bhi creative ho jati hai…! Aaiye dete hain kuchh examples...

ab parso hi ki baat hai ghar mein kuchh nahi 'hari sabzi' ke naam pe…siwaye “Shimla Mirch” ke, yahan tak ki payaz bhi nhi…wife aayee tension mein aur hum aaye attention mein…humne kaha priyatama, ab jao khelo beti aur amma, hum chalte hain rasoi mein aur karte hain kuchh intezaam…ab zahir si baat hai jab office se laut ke aap kar lete ho change phir bahar jaane ka mood kahan rehta hai...humne khoob socha, phir, Maa You Tube ko di awaz aur ek awaz mein pahunch pade India ke bade bade chef…humne samjha jab ‘hum hain itne special toh ho jaye something Special!!’ saare link chhan diye phir pehli baar apni cooking life mein bina pyaz ke sabzi banaayee, aur banaya “Aloo shimla mirch” pic mein dekhiye final report hai, ab aap hi bataiye hai na mazedar…iski khas baat ye ki meri family ke hisaab se kuchh bhi zyaadati nahi hui, matlab taste bhi aaya aur bitiya tak ne maze se udaaya aur kaha... Dad...wow, mazaa aagaya!!Confidence badha aur office bhi le aaye...yahan bhi sabne liye chatkare aur ishaara bas wahi, wah! kya baat hai...kuchh ne ki recipe ki demand humne dil hi dil kaha wah aaj ban gaye tum master chef...!

kal socha kuchh alag karne ko, phir pata laga wife ne bhigoye hai chhole…aap yaqeen nahi karoge pehli baar itne tasty chhole bane, aise chhole ki aap chahho toh bhature ke sath kha lo, chaho parathe le lo, yahan tak ki rice bhi chala sakte ho…matlab ungli chaatane wala taste aaya…bitiya rani bhi chatkhaare le rahi thin…waqt laga aur iss bar recipe bhi rich thi…kabhi banane ka jee kare toh khud ko rokiyega matt, mujhse behichak pooch sakte ho aur aap aazma bhi sakte ho…dekhiyega ungliyan na chati toh phir kya kahun…han “dubara try karna”. Ek baat bata dun apko, jaise photography mein ‘light & angle’ important hota hai theek waise hi cooking mein ‘timing and flame speed’ important hota hai…so be ready, dil jeetane ke liye…just say Takhliyaaaaaaaa!!!

"Awaz"

Chalo school chalaa jaye.....

                                          Mujhe apna college ka pehla din yaad aa gya…jab humare Profeesor sb. ne ek essay likhne ko kaha tha… “1^st day of my college” …par aaj na hi main keh sakta hun aur na hi class teacher…ki ek essay likho “1^st day of my SCHOOL”…shayad ab koi bhi samjh sakta hai…ki Aaj meri  dhaai saal ki beti “AAYAT” ke play school ka 1^st day tha. Mere khud ke school days yaad nahi, ho sakta hai Aayat ko bhi apna 1^st day of school yaad na rahe, issli liye iss lovely cute beti ke PAALE (pyare) PAPA khud usse likh rahe hain…taake uske ye platinum moments memory se washout na hon…!!

Date thi 11^th June 2014, subeh 8 clock ho raha tha, maine Aayat ko uthaya…9:30am ko school pahuchana tha, normally I use to call BETA or BABA…!!! Maine kaha… “BABA uthiye School nahi jaana kya….jawab kya aaya…? ”nahi Papa, abhi sone ka time hai”…ha ha ha ha…mujhe bahut hansi aayee…Sone ka time hai, iss baat ko sun ke.  Phir achanak Aayat uth ke baith jaati hain…aur poochhati hain kya bola Papa? Maine kaha yahi ki…”  BABA uthiye School nahi jaana kya…” phir who khush hote haue kehti hai… “Han Papa jaana hai….CHALO SCHOOL CHALA JAYE”. Phir hua miracle…jo har roz brush karne ke liye humein char chakkar ghumati thin aaj wahi Aayat khud kehti hain “Mumma Jaldi se BLUSH kalaooooooo (Brush karaao)”.  Aaj sebechari muuma ki duty double ho gayee thi…pehle sirf meri zimmedari thi aur ab Aayat add ho gayeen…Wife kitchen se bhaag ke aati hain aur brush karati hain aur main apne kapde press karne mein busy ho jaata hun par sath mein direction bhi chal rahi hai…meri bhi aur Aayat ki bhi…achanak issi beech Aayat kehti hain “Papa Dadi ko phone lagaiye”  main hairaan tha…”isse ab tak yaad hai!!!” darasal raat ko sone se pehle baat hui thi…ki ‘beta jaldi so jaiye, subeh Dadi se baat karni hai’, 

                                                            khair…Dadi se khoob baatein hoti hain, apni khushi ka poora izhaar kiya jaata hai aur daadi ki dher sari duaayein milti hain…phir taiyari qayam…ab mera lunch second priority ho gaya…isliye nahi ki Aayat ko pehle nikalana tha, hum dono ko sath jaana tha…par Aayat ko jaldi thi taiyar hone ki….”Mumma jaldi karo School ko der ho jayegi”. 9:30 am pahunchana tha…par haavi tha School ka craze, jo aaj poora hone wala tha…waise ‘SCHOOL KIT’ milne se aaj tak, har raat 2 baje bhi, Bag kaandhe pe taang ke School ke liye nikalne ko taiyar….!!! Ab baari dress ki , Wife so confused, ki Dress kya pehnaya jaye par jab bag open kiya, toh confusion door…kyunki maine pehle hi Aayat ke dress ko set laga kar rakh diya tha…dress pehanane ke baad, Aayat ki speed aur badh gayee…Mashallah bahut Cute lag rahi thi…par abhi mujhe nahana baqi tha…Tab tak ‘Doraemon’ ne Aayat ko sambhala aur main bhi taiyar ho gaya…1^st day tha, toh     Parents ko bhi kuchh excitement thi…par PAPA ki excitement phooo ho gayeee…jab School pahuchane ke baad teacher ne kaha…”Sorry Sir, Only Mam can come inside the class room”, jhenp gaya main…phir aahiste se maine kaha…”then I should leave  now” phir teacher ne smile karte hue kaha…Sorry again Sir” kya kehta…No No…its ok. Par hua kya Aayat Papa ko miss kar rahi thi…!!

                                                             Mumma : “Class room mein gaye toh kafi bachche the, sab apni apni Mom ke sath, infact GOAD mein, Aayat bhi mere Goad mein thi…bas farq itna hi tha ki almost saaare bachche ro rahe the aur Aayat beparwah thi!! Par Jab Teacher ne kaha ki “What’s ur name baby” toh Aayat ke totte ud gye..kuchh  jawab nahi diya, phir Teacher ne Rhymes ko gaane ke liye kaha to Aayat kehti hain “mujhe doodhu peena hai”, mujhe hansi aayee aur teacher bhi muskurayee…” phir teacher ne painting ke liye kaha toh bina waqt ganwaye shuru ho gayee….(darasal Aayat ghar mein achhi painting kar chuki thi, practice thi…lip gloss se wall pe, phir meri car ki keys se aur Good Knight ke pin se…aur banane ke baad kehti kya hain, “Babu so rahi hai, light off kar ke…” phir achanak Aayat ko apki (apne Papa ki) yaad aayee aur kehne lagi  Mumma chalo neeche Papa wait kar rahe honge…ro rahe honge…jab neeche aayee toh apko na dekh ke kaha ki “Jaa!!! Papa kahan chale gayein…Office?” maine kaha han…Office chale gaye. Phir Aayat ko ek aur duniya mil gayee…khel ki.. wahin, campus mein thodi der khelne koodane ke baad ghaar lautane ka waqt ho gaya! Pehla din tha toh time 1 ghanta hi tha yani 9:30-10:30. Paas mein ghar aur minute mein pahunch gayeen…pahunchate hi aisa laga ki ghalat jageh aaa gayeen…phir wahi baat hui…jo aam bachchon ke sath ulti hoti hai…Aayat kehti hai mumma mujhe phir se school jana hai…!! Wife shocked!!! Aayat phir duhrati hai …” Chalo n school chalaa jaye…”

2^nd day…. “mummaaaaaa daldi tallo ( jaldi karo) school late ho daungiiii (jaungi)….”

3^rd day…. “Papa itkool (school) nahi daundi (jaungi) mere pet mein dalad (dard) ho laha hai…

Enjoy this post….

"AwaZ"