Monday, July 21, 2014

Yaadon Ke Galiyare mein dil toh ab tak bachcha hai...



Pata nahi aapke sath hota hai ya nahi par mere sath kuchh ajeeb sa hota hai, par jo hota hai ek khubsoorat ehsaas deta hai. “jab bhi main Apni Yaadon Ke Galiyere ki sair karta hun toh main uss khaas lamhe ke mausam ki khushboo ko bhi mehsoos kar rha hota hun”.

Jalebi
aap hans rahe hain par aisa humesha hota hai mere sath Chahe hum jalebi (ek jalebi ped mein bhi lagti hai) tod rahe hon ya phir imli. Amrood churaa rahe hon ya phir ped pe hi baith ke khaane ka mazaaa le rahe hon...aaj bhi ye sab lazeez lagte hain...yaado mein, Kadam jaante hain aap, phal hai, khaya jata hai iske bade bade ped hote hain mango tree ki tarah, tasweer mein dekhiye, shayad samjh jayein, khane mein khatta par bahut achha lagta tha…dekhiye, abhi mere munh mein pani aane laga…Imli, ber samjhate hain na who bhi…aur Jamum bhi…!

Kadam
ye jitney bhi fruits bata raha hun main, usse humne bachpan mein kabhi nahi khareede. Ya toh ped pe chadh ke tod liye ya phir chura liye…par jamun ke ped pe kabhi nahi chadha…pata hai Kyun? Kyunki “chadhta toh Happy B’day ho jaata” bahut nazuq daaliyan hoti hain jamun ki aap bhi kabhi try matt karna, warna….han!!! khair …Par aaj humein ye fruits khareedane padte hai aur jab bhi hum kharedane jaate hain hum “Mungeri lal” ki tarah haseen sapno mein kho jaate hain…!! Aur sapne tootate tab hain jab unke bhaw sunte hain…Amrood 40/kg, Jamun… oh noooo…aajkal 40-60 rupaye paaw…!!!! Kachche Aam (Mango/Amiya/Tikola) jisse hum eint maar ke tod lete the woh 10-12 rupaye ka ek!!! Aur ek baat jaante hain aam ke ped pe kyun nahi chadhte the hum? Kyunki unn ped pe “Matta (Laal-laal moti-moti cheetiyan) hoti thin…jo ek baar lipat jaye toh bhangada se lekar break dance sabbbb karaa de! 




Shareefa
Arre ek cheez batana toh bhool hi gaya…”Shareefa” ye bhi hum chura ke hi khaate the…kachcha lekar aate aur Gehun (wheat) ya chawal se bhare drum mein chhupa dete, woh pak jaata, phir hum khaate, agar shareefa nahi pata toh pic mein dekh lijiyega…samjh jaiyega…aapne bhi zaroor khaya hoga…iss series mein papita (papaya) bhi aata hai, use bhi hum gehun ya chahwal ke drum mein chhupa ke pakaate the.  Ek aur phal TOOT (shehtoot) kya mazaa tha, khatta meetha!! Phir pani aa gya munh mein. Basically Shetoot meetha hota hai par hum usse meetha hone hi nahi dete the, issi liye taste khatta-meetha ka aata tha. 

* Ek do comedy aur tragedy wali story bhi hai…pehle tragedy phir comedy. 

Ber
Tragedymujhse bade bhaiya (2 saal bade) Pappu bhaiya aur unke dost aur mere dost, poora group, sab mil ke ber khane nikale…ber ke ped pe bhi chadh nahi sakte kyunki uski tehniyaan kateeli jhaadiyan type ki hoti hain, toh hum eint-patthar ka sahaara liya karte the, par size apne hath ke hisaab se hua karti thi, lekin bhaiya ne aadhi eint utha ke de maari, aur who eint ooopar hi gayee phans…humein pata nhi chala ki hua kya…tab tak doosare friend ne ussi daali pe eint de maari nateeja phansi hui eint aa giri mere sar pe…tab kuchh samjh nahi aaya, par jaise hi hath gya sar pe, unliyon mein laga khoon…oye hoye...phir nikli munh se cheek!!! Bhaiya dar k maare ho gaye ghayab, aur main rota hua pahuncha ghar, ghar pe hahaakar macha, wajeh kya bataun, jhooth bol ke bhaiya ko bachaya, par khud ko 3 stitches se nahi bacha paya aur na hi khud pe lage ban se rok paaya...jee han! kuchh dino ke liye mastiyon pe lag gayee ban!! 

Comedy: School jaana aur school se lautana…ek hi raaste se hua karta tha, aur dono hi taraf se ye fix tha ke raaste pe aane wale baaghiche mein hum ruk kar Jamun khayenge, phir wahi ber todane wali group ne jamun toda aur khaya, ek din khaate-khaate ek beej mere gale ke neeche utar gyee, ab meri haalat kharab ki ab kya hoga, tab tak bhaiya ne bataya ki ab sar ki taraf se jamun ka ped nikal jayega, humari haalat hui aur kharab. Ghar pahunche aur ek corner wale room mein baithe ro rahe the tabhi wahan baaji (Didi) pahunchi, who hairaan ke idher akela kyun ro rha hai, Baji ke bare mein ek baat bata dun, who bhale hi meri behan thi par mujhe bĂȘte ki paala hai, toh aap samjh sakte hain unko tadap kitni hui hogi, mujhe rota dekh kar, par uss dard ka chhoo mantar tab hua jab humne wajeh bataayee, who bhi thahaake laga ke hansane lagin aur saare ghar mein baat phail gayee aur sabki hansi phoot padi!!! baat hi kuchh aisi thi ki hansi ke siwa kuchh aa hi nahi sakti thi. ghar walo ne ek line aur jod di ki chalo ghar mein hi jamun ka ped hoga aur hum haath badha badha ke tod liya karenge...!

        Ek aur Comedy story hai par woh phal ki nahi chini (Sugar) ki chori ki hai…Bihar ka chhota shehar aur bijli ki waisi hi tangi thi, bachpan ki baat kar raha hun, ab toh khair sambhali hai kuchh haalat bijli ki, uss dauran andhere se yaaraana tha humara, par confusion dabbe ne create ki. Chini khane ki aadat bachpan se thi aur almost har bachche ko hoti hai…unn bachchon mein main bhi ek tha, par humaare ghar mein chini aur chai ki patti dono ek jaise dabbe mein hi rakhi jaati thi…samjh gaye shayad aap? khair andhere mein sirf shakl dikhi dabbe ki, par dhakkan khula mere aqal ka….chini ki jageh chai ki patti phaank li aur phir aangan mein naali ke paas ulti shuru…chori pakdi gayeee!!!

Waise aap bhi soch rahe honge ki jab bachpan mein itni chori ki hai toh ab kyaa haal hoga…? Toh hum bata dein ki yahi toh bachapana hota hai… “Laalchi bachpan” phir jaise jaise hum bade hote hain toh sahi ghalat ko samjh paate hain…waise laalach jab paida ho jaye aur inn sab phalo ki chori ka mauqa mil jaye toh aaj bhi hum baaz nahi ayenge aisa lagta hai…kyun ki “dil toh ab tak bachcha hai”!!! Ye sabne kiya hai aur sab karenge…kyunki sabhi ke dil mein “humesha ek bachcha zinda rehta hai” aur agar kisi din ye mar gaya toh samjh lijiye “Thakur toh giyo”…!!

"AwaZ"

Friday, July 11, 2014

”real celebration”



Iss baar ka b’day celebration waqai lajawab raha…aap isse keh sakte hain…”real celebration”, kyunki iss saal…1st time meri baby (dhai saal 2 ½ yr) ne kaha…  “Happy B’day to you Papa….” It’s a superb gift for me, as a father it was a golden moment, par afsos ye ki humne uss waqt use happy b’day kaha jab woh samjh bhi nhi sakti thi ki ye b'day hota kya hai par aur ab daily poochhati hai ki “Papa mera b’day cake lao na”…dil rakha par apne b’day pe, celebration meri thi par Cake laya Aayat ke liye!!!

                Sach toh ye hai ki bachpan se aaj tak humare ghar mein ‘B’day Celebration’ ka koi concept hi nahi raha, aur ek tarah se ghalat bhi nahi hai… it’s up to you ki aap kisse kis tarah samjhte hain…ye bas ussi behas ke jaise hai ki “kisi ne kaha ki ‘aadha glass bhara hai’ toh kisi ne kaha ki ‘aadha glass khali hai’…” Logic ye bhi hai ki ‘apki umr ka ek saal kum ho gya’ toh iske sath justification bhi hai ki ‘zindagi mein ek naya saal jud gya…’ khair meri bhi life mein b’day celebration ko lekar zyaada craze nahi raha, par han! jab jaisa mauqa mila achhi tarah celebrate bhi kiya…iss “achhi tarah” ko kaise define karun…? yun keh lein ki uss moment ko khubsoorat bana diya, itna khubsoorat ki jo bhi uss pal mere sath raha uske chehre pe smile glow karti rahi…aur mere liye isse bada gift kuchh ho bhi nahi sakta tha…!! 

                Kuchh yaadein hain jo iss mauqe pe share kiya ja sakta hai…shayad STD 1 ki baat hai, mere 'abba' (father) ne laad mein keh diya ki who mera “b’day celebrate karenge” who bhi ye baat ammi ke sath chal rahi thi par baat, mere kaano tak pahunch gayee…phir kya tha, khushi aisi ki jaise Eid ka chand dikh gya ho…class mein sabke kaano tak khabar pahunch gayee thi…par jo close friends the woh utaawale ho uthe aur maine bhi, b’day wale din School chhootate hi apne friends ke sath ghar!!! Idher hum hairan aur udher ammi!!! Hum hairan isliye ki mere b’day pe koi sajawat nahi, cake nahi aur ammi isliye ki ye fauj achanak!! Ammi samjh gayeen aur hum sabka smile ke saath welcome kiya sabhi ko bithaya aur kuchh taiyari shuru kar din…Cake…bilkul nahi…kuchh achha pakwan hi hoga. Ek baat shudhh sone ki tarah sach “meri ammi ke hathon ke pakwan…shhhhhhhh!!! So delicious!!” Phir hum sab ne khaya aur nikal liye. Aur ussi waqt humne li ek qasam ki “bhaiya ab ye Happy B’day celebration ka concept bheje se nikal do”. Isliye nahi ki Abba apna wada bhool gaye, balki ye keh sakte hain ki shayad humare Culture ka hissa nahi tha…!! Par aisa humesha nahi raha…apne liye nahi balki apne doston ke liye…!

                School mein friends cards bhejte rahe mujhe, “bhejana” iss liye ki father Police Officer the, har saal, 2 saal pe transfer hota hi rehta tha…har jageh naye friends aur har jageh celebration hoti rahi par bachchon wali….humne “Hadkuliya (yani mitti ki bartano mein khana banaye) manayee, saare bachche mil ke. Par jab maine ghar chhoda aur “Jamia Millia Islamia, New Delhi” mein admission liya toh iss celebration ka color badala, aur style bhi. Hum uss waqt aur pichhade nazar aane lage, Metro City ke culture ke aage hum baune lagne lage…phir bhi mann mein koi heen bhawana nahi, kyunki hum bahut crazy nahi rahe, yahan har friend ko ek-doosare ka B’day yaad rehta tha, main bhi unki list mein shamil ho gya. But meri life ka ek important part ye hai ki main milta sabhi se hun, par kuchh hi mere bahut close ho paate hain, yani mera trust, mera yaqeen ban paate hain, aur jab aisa ho gya main unke saamne humesha dil-o-jaan rakh deta hun, par aise log kum hi hote rahe hain… aur yahan “HUM 5” wala maamala humesha sath raha, bachpan se hi raha aisa keh sakta hun. Bachpan ke friends ka naam shayad yaad karna pade par Anu (class monitor tha main aur woh humesha mere barabar mein baithati thi, very sweet), Kamal (Bahut achhi drawing kiya karta tha), Prabhat-n-Prabhas (do judwa bhai ek hi class mein the), Sudha, Shakeel (Shakeel pata hai bahut ghareeb tha par ammi ne use sabse zyaada pyar diya, taras nahi tha woh, pyar tha), phir Mursheed (dimple smile wala, dil se song gungunaya karta tha), Anamika, Faisal, Inzamamul aur bhi bahut saare friends the aur ye sab +2 ke pehle wale hain, sabke naam yaad nahi aa rahe. +2 mein aaye toh bhi 5 friends mile main, Aafaque (baad mein hum rishtedar bhi ban gayee, bahut tez chalaata tha dimaagh aur mujhe bahut chahta hai aaj bhi), Ajay (Closeup keh lo…smile ke zariye motiyon se daant humesha chamkte rehte), Atul (bahut laborious, Dr. hai abhi), Kuldeep (bahut sharp mind and confident). Ye Graduation tak sath rahe aur aaj bhi sath qayam hai. Masters mein jab Jamia Millia Islamia mein Delhi aaya toh yahan bhi 5 friends bane main, Yazdani (Intelligent aur dil ka bahut saaf bhi) , Ibran (soft hearted, friends ke liye kuchh bhi karega wala maamala), Anjali (bahut sweet si, Urdu ka bahut shauq) aur Rana (aankhein bahut khubsoorat aur bolti bahut kum thi, itna kum ki usse Talking Machine ka title mila tha) . Phir Delhi University mein Journalism mein Addmission liya toh wahan bhi 'HUM 5', Main Ruchi (ye bhi Rana ki tarah hi Talking mchine thi, Punjabi hone pe kafi fakhr, but bahut sweet) Suchitra (very cool n calm, isse duniya mein sabse zyaada dar agar kabhi lagta tha toh "road cross" karne mein, no doubt aaj bhi ye dar qayam hoga) Santosh (bahut samjhdar, hansmukh), Swaroop (mast banda, main usse Munna bulata tha, apne chhota bhai ki tarah tha) aur Umakant (ye tha toh hum umr par thought se bahut mature, ek quality thi iski, any time chehre pe smile, mashallah). Job shuru hui who bhi Dainik jagran se wahan bhi Dost bane 5, main, Mamta (ek aur talking machine, dil ki bahut saaf aur talented bhi, ye bhi FM se judi thi, Ye FM GOLD pe aur main FM Rainbow pe, khud bhi sweet aur awaz bhi), Babban bhaiiii (ye laughter machine the, bas koi bahaana chahiye tha, aur chair pe kood kood ke hanste) Shweta( humesha apni senior se dukhi, par jaise hi mere studio ka rukh karti, toh woh lamha ban jaata tha “Happy Hour of the day) aur Monika (Very sweet n calm girl, woh akasar apni hansi ko samet ke muskaan mein badal deti thi, ek baar maine FM ka ek show office se hi kiya tha, 'Road Show' naam tha, mamata ko bhuttewali banaya tha, aur Monika ko Road pe guzarti hui ek ladki bata ke baat ki thi…ek tarah se humne Road Show nahi balki ek 'Stage Show' kiya tha, full drama, majboori thi achanak show karne ko mila aur kahin doosari jageh jaana possible bhi nahi tha, but bahut mazaa aaya tha uss din aur maine Monika ke liye ek song gaya tha... “simti si sharmayee si kiss duniya se tum aayee ho….” Ye sab yaadein aaj bhi dil ke bilkul qareeb hain…Dainik jagran was child hood of my career, isliye bachpane jaise guzaar diye woh paune do saal (21-22months)…waise bachpana aaj bhi qayam hai kyunki kaam creative hai aur ghar pe chhoti si bitiya!

 
Ab yahan main apne B’day celebration ki yaadon ki kitaab ko ek baar aur palatun toh ek waraq aisa khulta hai jispe INDIA GATE ki tasweer chhapi hui dikhti hai…jahan maine apne b’day pe cake kaata tha, waise INDIA GATE pe cake kya kaata itihaas hi racha maine…aaj bhi soch ke achha lagta hai…jab bhi Delhi jata hun uss ped ke paas zaroor jaane ki koshish karta hun jiske neeche baith ke Cake aur kuchh khubsoorat lamhe kaate the. iss waqt dil bas yahi keh raha hai “koi lauta de mere beete hue din… http://www.youtube.com/watch?v=OBdZDPrHzg8 >. 

Delhi se fligh li aur ja pahuncha Hyderabad, yahan mila surprise, B’day celebration ka, meri team ke bachche-bachchiyon ne na jaane kaise pata laga liya mera birth day, Subeh subeh jab office aaya toh mere desk pe flower bouquet….aur charo taraf se achanak b’day song shuru…bahut achha laga, aur bhi bahut saari harkatein achhi lagin…who Video main share karunga, par ye saari harkatein thin, Zarna (bahut samjhdar, calculative par sensitive bhi), Deepika (bahut chulbuli par intelligent) , Sruthi (bahut sweet, aur sweet singer bhi) ki, ye teenon main actor the aur supporting mein Gayatri (Bindaas girl, bahut khubsoorat awaz) Satish (so mature sound engineer with good creativity)  & Daya (master in photography aur passionate bhi). Phir ismein aur log bhi judte gaye, Zakir bhai, Subbu Sir, Narayan, Bharat etc. Sabhi hain Video mein maine bahut enjoy kiya aap bhi enjoy karenge…have a look, http://www.youtube.com/watch?v=aYx0TrNVx5o >.

Par@d end, abki saal ka jo birthday celebration tha woh awesome tha… Thank GOD ki unhone mujhe itni pyari beti se bless kiya, thank u so much GOD and my wife too. My wife is so cool and calm, always be a smiley face, polite and good human being. I am so lucky ki woh meri life partner hain. It’s  a co-incident ki mera 1st July aur unka b’day 7 th July hai…aur ye wala hai mera gift wife ki taraf se...That’s it friend. At last I want to wish me & my wife best of luck for a long journey of life. 

“AwaZ”

Sunday, June 29, 2014

Takhliyaaaaaaaa!!!



              Waise hai toh ad ek pan masala ka par punch line bahut mast hai… “Shauq badi cheeez hai….”  Aise hi ek punch ‘word’ bhi hai jo khud mein bahut lazeez hai…par agar who istemaal  sahi jageh pe hua toh….aur who word hai, Takhliyaaaaaaaa!!!
                                           Toh ab kahiye Tkahliyaaaaaaaa aur chaliye humaare sath… jee han! Bhaiyon aur bhaiyon ki behno, aaj hum aap sabhi ko uss jageh pe le challenge jahan aap chahein toh khud ko khud hi entertain kar sakte hain, khud hi khud ki peeth thapthapa sakte hain aur chahein toh khud ke matlab ke liye kisi ka dil bhi jeet sakte hain… who bhi nawaabon ke isstyle mein….aur keh sakte hain Takhliyaaaaaaaa!!! Aur who jageh hai apke ghar ki KITCHEN. 

Khaane ka shauq kisse nahi hai…aur agar khana shauq se khane ke sath-sath, shauq se banaya bhi jaye toh ‘Wah kya baat hai…’!!! main ye nahi keh rha ki sabhi banayein par jo banaana chahta hai, who banayein, aur  unhe jo aanand aayega hai uska kya kehna who sirf wahi bayaan kar sakte hain… isska andaza hum nahi laga sakte...! Iss anand ko maine jiya hai aur barahan jiya hai…iske do fayde hain ek toh gharwali happy aur doosara aur sabse important khaane ka swaad hud se zyaada. Shuruat karni chahein toh bas sahi waqt wahi jab aapko bhookh lagi ho tezzzz aur khana banane mein lagne wali ho derrrr … phir kya ghus jaiye kitchen mein aur phir hoga ye 'bhookh chali jaygi baaju mein aur khana banane lagega swadisht…' guaranteed!! Nahi aata banaa toh bhi achha hai, patni se poochh lijiye, unhein apka poochhana achha lagega, aur agar patni ji ke paas na ho waqt toh Youtube hai na…uspe maaro enter aur phir, shhhhhhh!!!!! lazeez pakwaan apke dining table par.


Pata hai main kya karta hun, You tube pe Sanjeev Kapoor se shuru karta hun aur ek grihani ke bhi pakwan ka tak ka leta hun jayeza aur ant mein banata hun pakwan khud ke style mein…buzurgo ne kaha hai na “Suno sabki karo apni” toh bhai aise mein ban jaata hun main Ghar ka “Master Chef” aur aapko achhi tarah pata ho ki jab aap kitchen mein ghuste ho toh sabse zyaada emotional Gharadi (Gharwali) hoti hai aur sabse zyaada tansion bhi gharaadi ko ho hoti hai…Emotional isliye ki ‘khane ki shakl mein pati ka pyar milta hai’ aur tension isliye ki "aaj toh hua kitchen ka styanashhh"…khair main toh ek hi kaam karne deta hun…EMOTIONAL…kitchen se nikala toh pehle se bhi saaf". Ek important baat aur agar aap apni Creativity ke liye mashhoor hain toh “KITCHEN is one of the best place to show your Creativity”. Jaise main Qayede se RJ aur profession se Creative Head…iska fayeda ye ki "Kitchen mein mere sath sath recipe bhi creative ho jati hai…! Aaiye dete hain kuchh examples...

ab parso hi ki baat hai ghar mein kuchh nahi 'hari sabzi' ke naam pe…siwaye “Shimla Mirch” ke, yahan tak ki payaz bhi nhi…wife aayee tension mein aur hum aaye attention mein…humne kaha priyatama, ab jao khelo beti aur amma, hum chalte hain rasoi mein aur karte hain kuchh intezaam…ab zahir si baat hai jab office se laut ke aap kar lete ho change phir bahar jaane ka mood kahan rehta hai...humne khoob socha, phir, Maa You Tube ko di awaz aur ek awaz mein pahunch pade India ke bade bade chef…humne samjha jab ‘hum hain itne special toh ho jaye something Special!!’ saare link chhan diye phir pehli baar apni cooking life mein bina pyaz ke sabzi banaayee, aur banaya “Aloo shimla mirch” pic mein dekhiye final report hai, ab aap hi bataiye hai na mazedar…iski khas baat ye ki meri family ke hisaab se kuchh bhi zyaadati nahi hui, matlab taste bhi aaya aur bitiya tak ne maze se udaaya aur kaha... Dad...wow, mazaa aagaya!!Confidence badha aur office bhi le aaye...yahan bhi sabne liye chatkare aur ishaara bas wahi, wah! kya baat hai...kuchh ne ki recipe ki demand humne dil hi dil kaha wah aaj ban gaye tum master chef...!

kal socha kuchh alag karne ko, phir pata laga wife ne bhigoye hai chhole…aap yaqeen nahi karoge pehli baar itne tasty chhole bane, aise chhole ki aap chahho toh bhature ke sath kha lo, chaho parathe le lo, yahan tak ki rice bhi chala sakte ho…matlab ungli chaatane wala taste aaya…bitiya rani bhi chatkhaare le rahi thin…waqt laga aur iss bar recipe bhi rich thi…kabhi banane ka jee kare toh khud ko rokiyega matt, mujhse behichak pooch sakte ho aur aap aazma bhi sakte ho…dekhiyega ungliyan na chati toh phir kya kahun…han “dubara try karna”. Ek baat bata dun apko, jaise photography mein ‘light & angle’ important hota hai theek waise hi cooking mein ‘timing and flame speed’ important hota hai…so be ready, dil jeetane ke liye…just say Takhliyaaaaaaaa!!!
"Awaz"